एटापल्ली प्रतिनिधी प्रबोधिनी न्युज : सुरजागड लोहखनिज प्रकल्पातून वाहतूक करणाऱ्या भरधाव ट्रकने दुचाकीला भीषण धडक दिल्याची घटना ताजी असतानाच, या अपघातात अतुल बुरे या तरुण कामगाराचा दुर्दैवी मृत्यू झाला आहे. या घटनेमुळे परिसरात तीव्र संताप व्यक्त होत असून मृताच्या कुटुंबीयांनी प्रशासकीय ढिसाळपणावर ताशेरे ओढले आहेत.
नेमकी घटना काय?
मिळालेल्या माहितीनुसार, अतुल बुरे हे आपल्या दुचाकीने कामावर जात असताना सुरजागड येथून खनिज घेऊन येणाऱ्या एका भरधाव ट्रकने त्यांना जोराची धडक दिली. धडक इतकी भीषण होती की अतुल यांचा जागीच मृत्यू झाला. अपघातानंतर परिसरात काही काळ तणावाचे वातावरण निर्माण झाले होते.
१० लाखांची मदत जाहीर, पण कुटुंबाचा संताप कायम
घटनेची गांभीर्य लक्षात घेता प्रशासनाकडून मृताच्या वारसांना १० लाख रुपयांची मदत जाहीर करण्यात आली आहे. मात्र, ही मदत नाकारत अतुल यांच्या कुटुंबीयांनी प्रशासनाला धारेवर धरले. “१० लाख रुपये देऊन आमचा माणूस परत येईल का? वारंवार होणाऱ्या या अपघातांमुळे माणसाचे जीवन एवढे स्वस्त झाले आहे का?” असा आर्त सवाल करत कुटुंबीयांनी आपला संताप व्यक्त केला.
वाहतुकीचा प्रश्न ऐरणीवर
सुरजागड लोहखनिज वाहतुकीमुळे होणारे अपघात आता नित्याचेच झाले आहेत. अवजड वाहनांची अनियंत्रित गती आणि अरुंद रस्ते यामुळे निष्पाप नागरिकांना आपला जीव गमवावा लागत आहे. प्रशासनाने केवळ आर्थिक मदत देऊन हात वर करू नये, तर या जीवघेण्या वाहतुकीवर कायमस्वरूपी तोडगा काढावा, अशी मागणी आता स्थानिक नागरिकांकडून केली जात आहे.
या घटनेमुळे संपूर्ण एटापल्ली तालुक्यात हळहळ व्यक्त होत असून, अतुल बुरे यांच्या निधनाने एका कष्टकरी कुटुंबाचा आधार हिरावला गेला आहे.
