प्रशांत रामटेके संपादक प्रबोधिनी न्युज – नागपूर: भंडारा-गोंदिया लोकसभा क्षेत्राचे काँग्रेसचे नवनियुक्त खासदार डॉ. प्रशांत पडोळे यांच्या ताफ्याला आज सकाळी नागपूरजवळ भीषण अपघाताचा थरार सोसावा लागला. एका भरधाव ट्रकने खासदारांच्या वाहनांच्या ताफ्याला जोरदार धडक दिली. या भीषण धडकेत वाहनांचे मोठ्या प्रमाणावर नुकसान झाले असले, तरी खासदार पडोळे आणि त्यांचे सहकारी या अपघातातून सुदैवाने थोडक्यात बचावले आहेत.
नेमकी घटना काय?
मिळालेल्या प्राथमिक माहितीनुसार, खासदार डॉ. प्रशांत पडोळे हे आपल्या नियोजित कार्यक्रमासाठी ताफ्यासह जात असताना नागपूरच्या वेशीवर हा अपघात घडला. ररस्त्यावरून जात असताना एका अनियंत्रित आणि भरधाव वेगाने येणाऱ्या ट्रकने खासदारांच्या ताफ्यातील गाड्यांना जोराची धडक दिली. धडक इतकी भीषण होती की खासदारांच्या वाहनाचा एक भाग पूर्णपणे चेपला गेला आहे.
खासदारांची प्रकृती स्थिर
अपघातानंतर ताफ्यातील सुरक्षा रक्षक आणि स्थानिक नागरिकांनी तातडीने मदतीसाठी धाव घेतली. सुदैवाने, डॉ. प्रशांत पडोळे यांना कोणतीही गंभीर दुखापत झालेली नाही. “देवाच्या कृपेने आणि जनतेच्या आशीर्वादाने मी आणि माझे सहकारी सुरक्षित आहोत,” अशी माहिती स्वतः खासदार पडोळे यांनी दिली आहे. खबरदारीचा उपाय म्हणून त्यांची वैद्यकीय तपासणी करण्यात येत आहे.
पोलिसांकडून तपास सुरू
घटनेची माहिती मिळताच पोलिसांनी घटनास्थळी धाव घेत पंचनामा केला आहे. अपघात घडवून आणणारा ट्रक आणि चालकाचा शोध घेतला जात असून, हा अपघात तांत्रिक बिघाडामुळे झाला की चालकाच्या निष्काळजीपणामुळे, याचा तपास पोलीस करत आहेत.
या घटनेची बातमी वाऱ्यासारखी पसरताच भंडारा-गोंदिया जिल्ह्यातील कार्यकर्त्यांनी आणि समर्थकांनी चिंता व्यक्त केली असून, खासदार सुरक्षित असल्याचे समजताच सर्वांनी सुटकेचा निश्वास टाकला आहे.
