पुणे प्रतिनिधी प्रबोधिनी न्युज नेटवर्क – जागतिक महिला दिनाचे औचित्य साधून सत्यश्री सोशल फाउंडेशन तर्फे आयोजित ‘भव्य महिला सन्मान सोहळा व महिला मेळावा’ उत्साहात संपन्न झाला. वडगाव खुर्द येथील सुवासिनी मंगल कार्यालयात पार पडलेल्या या कार्यक्रमात विविध क्षेत्रांत उल्लेखनीय कार्य करणाऱ्या महिलांचा गौरव करण्यात आला. यामध्ये ॲड. स्वाती ताई मोराळे यांना त्यांच्या सामाजिक व विधी क्षेत्रातील योगदानाबद्दल विशेष सन्मान प्रदान करण्यात आला.
निलमताई उदय सामंत यांच्या हस्ते गौरव
हा सन्मान सोहळा निलम उदय सामंत यांच्या प्रमुख उपस्थितीत पार पडला. त्यांच्या हस्ते ॲड. स्वाती मोराळे यांचा सत्कार करण्यात आला. “स्त्री शक्तीचा सन्मान करणे ही काळाची गरज असून, स्वाती ताईंसारख्या महिला समाजासाठी प्रेरणादायी आहेत,” असे मत यावेळी मान्यवरांनी व्यक्त केले. याप्रसंगी निलमताई शिर्के यांचीही विशेष उपस्थिती लाभली होती.
खेळ, गप्पा आणि मनोरंजनाची मेजवानी
केवळ सत्कार सोहळाच नव्हे, तर महिलांसाठी हा एक आनंदाचा उत्सव ठरला. कार्यक्रमात महिलांसाठी ‘प्रेरणादायी मार्गदर्शन’ सत्राचे आयोजन करण्यात आले होते. तसेच रोजच्या धावपळीतून विरंगुळा मिळावा यासाठी खेळ, गप्पा आणि मनोरंजनाचे विविध कार्यक्रम पार पडले, ज्याला सिंहगड रोड परिसरातील महिलांनी मोठ्या संख्येने प्रतिसाद दिला.
कृतज्ञता आणि अभिनंदन
आपल्या सत्काराला उत्तर देताना ॲड. स्वाती मोराळे यांनी सत्यश्री सोशल फाउंडेशन आणि सर्व उपस्थितांचे मनापासून आभार मानले. महिलांच्या सक्षमीकरणासाठी असे उपक्रम स्तुत्य असल्याचे त्यांनी नमूद केले. या यशाबद्दल राहुल खरात व मित्र परिवाराकडून स्वाती ताईंचे विशेष अभिनंदन करण्यात येत आहे.
