वर्धा प्रतिनिधी प्रबोधिनी न्युज – दि.24 : अल्पमुदत प्रशिक्षण आयटीआय स्टेप अंतर्गत प्रशिक्षण घेणाऱ्या इच्छुक बेरोजगार उमेदवारांकरीता तसेच जिल्ह्यातील 12 वी, आयटीआय, पदवीधर व डिप्लोमाधारक उमेदवारांकरीता पुलगाव व वर्धा येथे पंडित दिनदयाल उपाध्याय रोजगार मेळावा व प्लेसमेंट ड्राईव्हचे आयोजन करण्यात आले आहे. या मेळाव्याचा उमेदवारांनी लाभ घ्यावा, असे आवाहन करण्यात आले आहे.
वर्धा येथे जिल्हा कौशल्य विकास रोजगार व उद्योजकता मार्गदर्शन केंद्र व पांडुरंग सदाशिव खानखोजे शासकीय औद्योगिक प्रशिक्षण संस्थेच्या संयुक्त विद्यमाने पांडूरंग सदाशिव खानखोजे शासकीय औद्योगिक प्रशिक्षण संस्था येथे 27 मार्च रोजी व पुलगाव येथे जिल्हा कौशल्य विकास रोजगार व उद्योजकता मार्गदर्शन केंद्र व हरदयाल शासकीय औद्योगिक प्रशिक्षण संस्थेच्या संयुक्त विद्यमाने हरदयाल शासकीय औद्योगिक प्रशिक्षण संस्था पुलगाव येथे 30 मार्च रोजी पंडित दिनदयाल उपाध्याय रोजगार मेळावा व प्लेसमेंट ड्राईव्हचे आयोजन करण्यात आले आहे.
या मेळाव्यात नामांकीत कंपन्याच्यावतीने प्रतिनिधी उपस्थित राहून उमेदवारांच्या मुलाखती घेऊन निवड प्रक्रिया राबविण्यात येणार आहे. इच्छुकांनी मुळ शैक्षणिक पात्रतेच्या प्रमाणपत्रांसह मेळाव्यास उपस्थित राहावे, असे जिल्हा कौशल्य विकास रोजगार व उद्योजकता मार्गदर्शन अधिकारी यांनी कळविले आहे.
