आला वसंत साजिरा
चैत्र पालवी फुटली
मोहरली आमराई
कोकिळेच्या मधुकंठी
वसंत ऋतुचा गोडवा
पसरे खुल्या रानोमाळी
वाऱ्याची सळसळ होता
झुलती पाने तांबूस कोवळी
पळस पारिंग्याचा साज
केशरी रंगाची बरसात
सावरीच्या काट्यातही
फुले उमलती परसात
आला ऋतुराज वसंत
घेऊनी आनंदाचे क्षण
निसर्गातील सौंदर्याची
दाही दिशातुनी उधळण
सनईचे मंगल मधुरस्वर
घुमती लग्नमंडपातुनी
सजली वऱ्हाडी मंडळी
मंगल अक्षता हाती घेऊनी
पळसाच्या पानावरी
लग्न पंगत सजली
मांडवाच्या तोरणाला
लेकुरवाळी केळ आली
मनामनात पसरला
लाल कुसुंबी वसंत
वधु वरांना भेटण्यास
नाही मिळाली ऊसंत
सौ.वंदना शशिकांत पाटील, मुंबई
