प्रबोधिनी न्युज नेटवर्क – रायपूर:छत्तीसगडमधील वेदांता पॉवर प्लांटमध्ये आज एक अत्यंत भीषण दुर्घटना घडली आहे. प्लांटमधील बॉयलरचा जोरदार स्फोट झाल्याने १० कामगारांचा जागीच मृत्यू झाला असून, ४० हून अधिक कामगार गंभीर जखमी झाले आहेत. या घटनेमुळे संपूर्ण परिसरात खळबळ उडाली आहे.
नेमकी घटना काय?
मिळालेल्या प्राथमिक माहितीनुसार, प्लांटमध्ये काम सुरू असताना अचानक बॉयलरचा मोठा स्फोट झाला. हा स्फोट इतका भीषण होता की त्याचा आवाज दूरपर्यंत ऐकू आला. स्फोट झाला तेव्हा त्या ठिकाणी अनेक कामगार कर्तव्यावर होते. या दुर्घटनेत १० जणांचा दुर्दैवी मृत्यू झाला असून जखमींना तातडीने जवळच्या रुग्णालयात हलवण्यात आले आहे. जखमींपैकी अनेकांची प्रकृती चिंताजनक असल्याने मृतांचा आकडा वाढण्याची भीती व्यक्त होत आहे.
बचावकार्य युद्धपातळीवर सुरू
घटनेची माहिती मिळताच पोलीस प्रशासन आणि अग्निशमन दलाच्या गाड्या घटनास्थळी दाखल झाल्या आहेत. प्लांटमध्ये अद्यापही काही कामगार अडकले असल्याची शक्यता वर्तवण्यात येत असून, बचावकार्य वेगाने सुरू आहे. ढिगारा उपसण्याचे काम सुरू असून प्रशासनाकडून मृतांच्या नातेवाईकांशी संपर्क साधण्याचे प्रयत्न सुरू आहेत.
या भीषण अपघातामुळे कामगारांच्या सुरक्षेचा प्रश्न पुन्हा एकदा ऐरणीवर आला असून, स्फोटाचे नेमके कारण अद्याप स्पष्ट झालेले नाही. या प्रकरणाची उच्चस्तरीय चौकशी करण्याचे आदेश देण्यात आले आहेत.
