समारोपीय कार्यक्रमाला माजी जि. प. सदस्य प्रमोदभाऊ चिमूरकर यांची विशेष उपस्थिती
कपिल मेश्राम
विशेष जिल्हा प्रतिनिधि
चंद्रपुर
ब्रम्हपुरी तालुक्यातील मांगली येथे ज्ञानदान श्रीमद हरिनाम भागवत सप्ताहाचा समारोपीय कार्यक्रम दिनांक ३० डिसेंबर २०२४ रोज सोमवार झाला. २४ तारखेपासून मांगली गाववासीय जनता तथा श्री हनुमान देवस्थान मंडळ मांगली यांच्या सौजन्याने या ज्ञानदान श्रीमद हरिनाम भागवत सप्ताहाला सुरुवात झाली होती. मागील सात दिवसांपासून मांगली येथील सार्वजनिक हनुमान मंदिराच्या आवारात यवतमाळ जिल्ह्यातील दाभा पाहुर येथील ह.भ.प. सुरेखा तिखे महाराज यांच्या अमृततुल्य वाणीतुन गावातील नागरिकांचे प्रबोधन करण्यात आले.
भागवत सप्ताहाच्या समारोपीय कार्यक्रम प्रसंगी विशेष अतिथी म्हणून माजी जिल्हा परिषद सदस्य प्रमोद चिमूरकर हे उपस्थित होते. तर प्रमुख अतिथी म्हणून भावेश दोनाडकर उपसरपंच मांगली,नानाजी मुंडरे मा.सरपंच,चंद्रकांतजी राऊत मा.सरपंच, गोकुल कार मा.उपसरपंच,गोनशेट्टीवार महाराज, यांसह अन्य मान्यवर यावेळी उपस्थित होते.
या भागवत सप्ताहाच्या समारोपीय कार्यक्रम प्रसंगी प्रमोद चिमूरकर म्हणाले की, भागवत सप्ताह म्हणजे ज्ञानयज्ञ सोहळा आहे. त्यामुळे त्यातील तत्त्वज्ञान समजून घ्यायला हवे, मानवता हाच आपल्या धर्माचा आधार आहे. मनुष्य हा विचारांनी आणि कर्मांनी स्वतःसाठी आणि इतरांसाठी उत्तम भविष्य निर्माण करू शकतो. माणसाने माणसाप्रमाणे व्यवहार करून विकास साधणे व आनंद निर्माण करून घेणे हाच खरा धर्म असल्याचे स्पष्ट होत जाते. असे त्यांनी सांगितले.
