मातृभाषा मराठी ही
शान हो महाराष्ट्राची
भाषा अमृताचा झरा
असे मधुर वाणीची
माझ्या माय मराठीचा
आहे फार अभिमान
राजभाषा शासनाची
नित्य करुया सन्मान
माझ्या मराठी भाषेचे
किती गावे गुणगान
सर्व बोलीत विलीन
आहे सुवर्णाची खाण
माय माउली मराठी
वाणी अवघ्या संतांची
ओवी अभंग भजन
शोभा कथा कीर्तनाची
दिनकर उगवता
कानी सुरेल भूपाळी
गाई माय जात्यावर
गाणी सुरेख निराळी
मायबोली भाषा माझी
साहित्याचा अलंकार
शब्दसाज देता काव्या
मिळे सुंदर आकार
लवचीक माझी भाषा
जैसी वळवावी तिला
वैविध्याने नटलेली
अर्थ प्राप्त साहित्याला
नम्रता खरे
मुंबई बोरीवली
