प्रशांत रामटेके मुख्य संपादक प्रबोधिनी न्युज – ठाणे- 20 ऑगस्ट 2024: बद्लापूर येथे लहान मुलीवर झालेल्या क्रूर लैंगिक अत्याचाराच्या घटनांच्या विरोधात भारतिय स्वदेशी कॉंग्रेसच्या वतीने तीव्र आंदोलन करण्यात आले. या आंदोलनाचे नेतृत्व राष्ट्रीय अध्यक्ष पूनम गुप्ता “दीदी श्री” यांनी केले. त्यांनी लैंगिक अत्याचाराच्या आरोपींना त्वरित मृत्युदंडाची शिक्षा देण्याची मागणी केली, तसेच राज्य सरकारवर गंभीर आरोप करत, खालील मुद्दे उपस्थित केले:
1. पोलीसांच्या विलंबित कारवाईबद्दल कडक कारवाई: पोलिसांनी तक्रार त्वरित न घेतल्यामुळे आरोपींना मोकळीक मिळाली. अशा पोलीस अधिकाऱ्यांना त्वरित निलंबित करावे.
2. शाळेच्या उच्चाधिकार्यांची जबाबदारी: शाळेच्या उच्चाधिकार्यांना आणि शिक्षकांना या प्रकरणात आरोपींप्रमाणेच जबाबदार धरले जावे.
3. सरकारच्या योजनांवर प्रश्न: “लाडकी बहिण” सारख्या योजनांचा प्रचार होतो, परंतु महिलांच्या आणि मुलांच्या सुरक्षेसाठी कोणतीही ठोस कारवाई होत नाही.
4. गृहमंत्र्यांचा राजीनामा: या भयंकर घटनेच्या पार्श्वभूमीवर गृहमंत्र्यांनी तातडीने राजीनामा द्यावा.
5. “सुरक्षित बहीण, सुरक्षित मुलगी” योजना: “लाडकी बहिण” ऐवजी, सरकारने “सुरक्षित बहीण, सुरक्षित मुलगी” योजना लागू करावी.
6. शक्ती कायद्याची तातडीने अंमलबजावणी: शक्ती कायद्याची त्वरित अंमलबजावणी करून आरोपींवर कठोर कारवाई करण्यात यावी.
पूनम दीदी यानीं ठणकावून सांगितले की, “भाजप आणि शिवसेना हे केवळ मोठ्या उद्योजकांच्या फायद्यासाठी काम करत आहेत आणि सामान्य जनतेला पूर्णतः दुर्लक्षित करत आहेत. त्यांच्या या धोरणामुळे महिलांचे आणि मुलांचे जीवन अधिक असुरक्षित झाले आहे.”
त्यांनी विचारले, “नेहमी सांगितले जाते की, उशिरा बाहेर जाऊ नका, लहान कपडे घालू नका, आणि असे वागून अशा लोकांना आमंत्रण देऊ नका. पण हे लहान बालक लैंगिक अत्याचाराचे बळी ठरले, ते कोणत्या कारणासाठी? त्यांनी लहान कपडे घातले होते का? ते उशिरा रात्री बाहेर होते का? की ते क्लबमध्ये पार्टी करत होते? या बालकांना फक्त शाळेत जाण्याचे कारण म्हणून का अत्याचार सहन करावे लागले? याचा अर्थ असा आहे की आपल्या शाळाही आता मुलांसाठी सुरक्षित नाहीत का?”
भारतिय स्वदेशी कॉंग्रेसने या घटनेचा तीव्र निषेध केला असून, समाजातील महिलांचे आणि मुलांचे संरक्षण करण्याची मागणी केली आहे. सरकारने या अपराध्यांना कठोर शिक्षा देऊन समाजात न्याय प्रस्थापित करावा आणि महिलांच्या आणि मुलांच्या सुरक्षेसाठी त्वरित पावले उचलावी, अशी त्यांनी मागणी केली आहे. भारतिय स्वदेशी कॉंग्रेसने स्पष्ट केले आहे की, हे आंदोलन न्याय मिळेपर्यंत सुरू राहील आणि सरकारने सामान्य जनतेच्या सुरक्षिततेची जबाबदारी गांभीर्याने घेतली पाहिजे.
