प्रशांत रामटेके संपादक प्रबोधिनी न्युज – चिमूर/पिंपर्डा:तालुक्यातील पिंपर्डा येथील सुपुत्र ज्ञानेश्वर मेश्राम यांनी आपल्या कसदार अभिनयाच्या जोरावर ‘झाडीपट्टी रंगभूमी’ आणि वडसा देसाईगंज परिसरातील नाट्यसृष्टीत स्वतःचे वेगळे स्थान निर्माण केले आहे. अनेक वर्षांपासून रंगभूमीची अखंड सेवा करत त्यांनी विविध दर्जेदार नाटकांतून आपल्या अभिनयाची प्रभावी छाप उमटवली आहे.
दिग्गज कलावंतांसोबत अभिनयाची जुगलबंदी
ज्ञानेश्वर मेश्राम यांना मराठी चित्रपट व नाट्यसृष्टीतील दिग्गज कलाकार मोहन जोशी, कुलदीप पवार, रमेश भाटकर आणि राजेश चिटणीस यांच्यासोबत काम करण्याची संधी लाभली. या नामवंत कलाकारांसोबत रंगभूमीवर काम करताना त्यांनी आपल्या अभिनय कौशल्याने प्रेक्षकांना मंत्रमुग्ध केले.
गाजलेली नाटके आणि प्रभावी भूमिका
मेश्राम यांनी साकारलेल्या ‘संतान’, ‘लाडका’, ‘मायबाप’, ‘त्याग’, ‘भूक’ आणि ‘घास’ यांसारख्या नाटकांनी प्रेक्षकांच्या मनात विशेष स्थान मिळवले आहे. कौटुंबिक व सामाजिक विषयांवरील भूमिकांमुळे त्यांची वेगळी ओळख निर्माण झाली आहे. वडसा देसाईगंज येथील विविध नाट्य कंपन्यांच्या माध्यमातून त्यांनी झाडीपट्टीची समृद्ध कला महाराष्ट्रभर पोहोचवण्याचे मोलाचे कार्य केले आहे.
युवराज प्रधान यांच्यासोबत दीर्घ सहकार्य
सन २०१५ पासून ते दिग्दर्शक युवराज प्रधान यांच्या सोबत सातत्याने काम करत आहेत. या सहकार्यामुळे त्यांच्या अभिनयाला अधिक धार मिळाली असून अनेक यशस्वी नाट्यप्रयोग साकारले गेले आहेत.
ग्रामीण भागातून पुढे येत रंगभूमीवर आपली ठाम ओळख निर्माण करणाऱ्या ज्ञानेश्वर मेश्राम यांच्या या प्रेरणादायी प्रवासाचे चिमूर तालुक्यात सर्वत्र कौतुक होत आहे.
