“समोरचा खून होण्याची वाट न पाहता गावाची सुरक्षा मजबूत करा” — ग्रामस्थांचा संतप्त इशारा
प्रशांत रामटेके संपादक प्रबोधिनी न्युज – विसापूर गावात वाढत असलेल्या गुन्हेगारी घटनांमुळे विसापूर परिसरातील नागरिकांमध्ये भीती आणि असुरक्षिततेचे वातावरण निर्माण झाले आहे. काही दिवसांपूर्वी घडलेल्या चोरीच्या घटनेनंतर नुकत्याच झालेल्या खूनाच्या घटनेने संपूर्ण गाव हादरून गेले आहे. या पार्श्वभूमीवर गावातील नागरिकांनी ग्रामपंचायत प्रशासनाकडे तातडीने CCTV कॅमेरे बसविण्याची मागणी करत निवेदन सादर केले आहे.
ग्रामस्थांनी दिलेल्या निवेदनात गावातील प्रमुख चौक, बाजारपेठ, शाळा परिसर, सार्वजनिक ठिकाणे तसेच गावात येणाऱ्या-जाणाऱ्या मुख्य मार्गांवर आधुनिक CCTV कॅमेरे बसविण्याची मागणी करण्यात आली आहे. गावाची वाढती लोकसंख्या आणि बाहेरील व्यक्तींची वाढती वर्दळ लक्षात घेता सुरक्षा व्यवस्थेची आवश्यकता अधिक तीव्र झाल्याचे नागरिकांनी नमूद केले आहे.
नागरिकांच्या म्हणण्यानुसार, गावात अद्याप प्रभावी आधुनिक सुरक्षा यंत्रणा उपलब्ध नसल्यामुळे गुन्हेगारांमध्ये कायद्याची भीती राहिलेली नाही. अनेक भागांमध्ये रात्री अंधाराचे साम्राज्य असल्याने संशयास्पद हालचाली वाढत असून नागरिकांमध्ये चिंतेचे वातावरण निर्माण झाले आहे.
चोरीच्या घटनेनंतर नागरिक आधीच अस्वस्थ होते. त्यातच घडलेल्या खूनाच्या घटनेमुळे गावात भीतीचे वातावरण निर्माण झाले आहे. महिला, ज्येष्ठ नागरिक आणि विद्यार्थ्यांच्या सुरक्षेचा प्रश्न ऐरणीवर आला असून अनेक पालक आपल्या मुलांच्या सुरक्षिततेबाबत चिंता व्यक्त करत आहेत.
“घटना घडल्यानंतर कारवाई करण्यापेक्षा त्या रोखण्यासाठी आधीच उपाययोजना करणे आवश्यक आहे. आणखी एखादी गंभीर घटना घडण्याची वाट न पाहता ग्रामपंचायतीने तातडीने CCTV कॅमेरे बसवावेत,” अशी भावना ग्रामस्थांनी व्यक्त केली.
ग्रामस्थांच्या मते, गावातील विविध ठिकाणी CCTV कॅमेरे बसविल्यास संशयास्पद व्यक्तींवर लक्ष ठेवणे शक्य होईल. चोरी, मारामारी, अवैध कृत्ये आणि इतर गुन्हेगारी प्रकारांवर नियंत्रण मिळविण्यास मदत होईल. तसेच पोलिस तपास अधिक वेगाने होऊन गुन्हेगारांचा शोध घेणे सोपे जाईल.
यावेळी उपस्थित युवक व सामाजिक कार्यकर्त्यांनीही ग्रामपंचायतीने या विषयाकडे गांभीर्याने पाहण्याची गरज व्यक्त केली. “गावाच्या विकासासोबत नागरिकांची सुरक्षा हीसुद्धा तितकीच महत्त्वाची आहे. CCTV कॅमेरे ही आजच्या काळाची अत्यावश्यक गरज बनली आहे,” असे मत त्यांनी मांडले.
ग्रामपंचायतीने तातडीने विशेष बैठक बोलावून गावासाठी CCTV सुरक्षा योजना तयार करावी, आवश्यक निधी उपलब्ध करून महत्त्वाच्या ठिकाणी आधुनिक कॅमेरे बसवावेत, अशी मागणी नागरिकांनी केली आहे.
विसापूरमधील वाढत्या गुन्हेगारी घटनांच्या पार्श्वभूमीवर ग्रामस्थांच्या या मागणीवर ग्रामपंचायत प्रशासन कोणता निर्णय घेते, याकडे आता संपूर्ण गावाचे लक्ष लागले आहे.
