छत्रपती संभाजीनगर प्रतिनिधी
प्रबोधिनी न्युज
छत्रपती संभाजीनगर: गावातील महिलेसोबत असलेल्या अनैतिक संबंधास पत्नी विरोध करते म्हणून पतीने २८ वर्षीय महिलेला बेदम मारहाण केली. बेदम मारहाणीत जखमी झालेल्या महिलेवर घाटीत उपचार सुरू होते. मात्र उपचारादरम्यान महिलेचा मृत्यू झाल्याचं कळताच नातेवाईकांनी गोंधळ घालत तिच्या पतीला बेदम चोप दिला. ही घटना रांजणगाव शेंनपुंजी येथे घडली. याप्रकरणी मयत महिलेच्या भावाने दिलेल्या तक्रारीवरून महिलेच्या पती विरुद्ध गुन्हा दाखल करण्यात आला आहे.
या प्रकरणी अधिक माहिती अशी की,प्रियंका संदीप राऊत (वय २८ रा. बुलढाणा) असे मृत महिलेचे नाव आहे. मयत प्रियंका व आरोपी संदीप यांचा विवाह चार वर्षापूर्वी झाला होता. राऊत दाम्पत्य मागील दोन वर्षापासून वाळुज येथील औद्योगिक वसाहतीमध्ये काम करत असल्याने ते रांजणगाव भागात भाड्याच्या घरात वास्तव्यास होते. दरम्यान संदीपचे गावातील एका महिलेशी अनैतिक संबंध होते. याची कुणकुण पत्नी प्रियांकाला लागली. तिने पतीला समजावून सांगण्याचा प्रयत्न केला. मात्र संदीप काही ऐकण्याच्या मनस्थितीत नव्हता यावरून त्यांचे अनेक वेळा खटके उडाले.
