पुणे (बारामती) : पुण्यातील बारामती येथील कारागृहातील उपहारगृहात दोघा आरोपींनी स्वतःवरच वार करून घेत स्वतःला गंभीर जखमी करुन घेतलं असल्याचा धक्कादायक प्रकार उघडकीस आला आहे. या प्रकरणी बारामती शहर पोलिसांनी त्यांच्याविरोधात गुन्हा दाखल केला आहे.
अजयसिंह अर्जुनसिंग दुधाणे (रा. बहत्तर वस्ती, पाण्याच्या टाकीजवळ, पुणे) आणि बच्चनसिंग जोगिंदरसिंग भोड (रा. गोसावीवस्ती, बिराजदार वैदवाडी, पुणे) अशी गुन्हा दाखल झालेल्यांची नावे आहेत. या प्रकरणी शहर पोलीस ठाण्यात हवालदार किरण आवारे यांनी फिर्याद दिली. गुरुवारी (दि. १४) तारखेला ही घटना घडली.
आवारे यांना या दिवशी उपहारगृहात गार्ड अंमलदार म्हणून ड्युटी होती. बराक क्र. ५ मध्ये न्यायालयीन कोठडीतील सात व पोलीस कोठडीतील पाच आरोपी बंदिस्त होते. चोरीच्या गुन्ह्यात अटकेत असलेल्या दुधाणे व भोड हे याच बराकीत होते. दुपारी बराकीची पोलीस पाहणी करत असताना हे दोघे आरोपी जखमी झालेले दिसले. त्यांच्या अंगातून रक्त येत होते. इतर आरोपींकडे चौकशी केली असता या दोघांनी स्वतःच शरीरावर कशाने तरी मारून घेत जखमी केल्याचे दिसून आले. पोलिसांनी तत्काळ या दोघांना सिल्व्हर ज्युबिली उपजिल्हा रुग्णालयात उपचारासाठी दाखल केले.
