शब्द माझे झाले गाणे गाण्याला ज्या तुझे होते स्वर
आठवते का गीत जुने ते आयुष्याच्या या वळणावर
चल एकदा आपण पुन्हा भेटुयात त्या वळणावर
जेथून दो वाटा जात होत्या वेगळ्या दो रस्त्यावर
भेटायचे का आपण पुन्हा तसेच त्या जोड रस्त्यावर
सोडून पाय पुन्हा बसूयात त्या ओढ्याच्या काठावर
आपले स्वप्नांचे होते मंदिर ज्या ओढ्याच्या काठावर
बघुया आहे का बहर अजुन तिथल्या गुलमोहरावर
भिजल्या डोळ्यांना साक्ष होता तो जो गुलमोहर
शोधू काही जुनी भेटीची चिन्हे पुन्हा त्या जागेवर
पुन्हा न भेटण्याचे ठरविले होते आपण ज्या जागेवर
चल एकदा भेटू आपण पुन्हा दूरवर जाण्या अगोदर
कवी अविनाश गडवे (अवती), नाशिक.
