नंदीबैल येता घरी
मुले आनंदित झाली
वाजे ढोल गुबूगुबू
मुले धावतच आली।।१।।
मोठे मोठे त्याची शिंगे
वाटे रुबाब तो भारी
छान सजे नंदीबैल
आली वाजत सवारी।।२।।
बोले नंदीबैल खरे
सत्य असे त्याची वाणी
चारा पाणी देई त्याला
सांगतो भविष्यवाणी।।३।।
झुल रंगीबेरंगी हे
शोभे पाठीवरी छान
आले सुख माझ्या घरी
दिला आशीष महान।।४।।
मान डोलवत राही
पाऊस होईल छान
महादेवाच्या रूपान
सुख नांदे समाधान।।५।।
करू पूजा, खरोखर
देऊ ही पुरणपोळी
नंदीबैल येता घरी
भरे आनंदाने झोळी।।६।।
प्रा.समिंदर निवृत्तीराव शिंदे
लातूर
