चंद्रपूर : आज जटपूरा वार्ड येथील पंच तेली समाज हनुमान मंदिर प्रांगणात पारंपरिक पद्धतीने *तान्हा पोळा* उत्सव मोठ्या उत्साहात साजरा करण्यात आला. ग्रामीण परंपरेशी जोडलेला हा उत्सव समाजात एकात्मता, संस्कार व संस्कृतीचे जतन करण्यासाठी अत्यंत महत्त्वाचा मानला जातो.
या कार्यक्रमात लहान मुलांनी बैलांच्या प्रतिकात्मक मूर्ती सजवून त्यांची मिरवणूक काढली. गोड गाणी, पारंपरिक ढोल-ताशांच्या निनादात परिसर दुमदुमून गेला. मुलांच्या निरागस आनंदामुळे वातावरण उत्साहपूर्ण व मंगलमय झाले. परंपरेतून संस्कृतीचे जतन आणि बालकांच्या सहभागातून समाजात सकारात्मक ऊर्जा निर्माण होते, याची जाणीव या प्रसंगी सर्वांना झाली.
कार्यक्रमाला जटपूरा वार्डातील नागरिक मोठ्या संख्येने उपस्थित राहिले. स्थानिक नागरिकांनी या उपक्रमाचे कौतुक करताना सांगितले की अशा पारंपरिक सण-उत्सवांमुळे मुलांमध्ये संस्कार, सामूहिकता आणि परंपरेचे महत्त्व समजते. तसेच समाजातील ऐक्य व बंधुभाव दृढ होण्यास मदत होते.
संपूर्ण कार्यक्रमात पंच तेली समाजातील कार्यकर्त्यांनी विशेष परिश्रम घेऊन उत्सवाचे आयोजन यशस्वी केले. तान्हा पोळ्याचा पारंपरिक उत्साह व सणाची उर्जा यामुळे जटपूरा वार्ड परिसर सणमय झाला होता.
