बाप आभाळा सारखा
त्याला धरतीची माया
नारळाच्या परी बाप
ऊभ्या आयुष्याचा पाया
बाप कष्टाचा पहाड
तसा सोसाट्याचा वारा
नेई एकटा वाहूनी
डोई संकटाचा भारा
बाप विशाल मनाचा
जणू सागराच्या लाटा
आयुष्याच्या अंधारात
चाले तुडवत वाटा
पुणवेच्या चंद्रापरी
बाप शितल चांदणं
सुख दुःखाच्या संसारी
माय बापाचं नांदणं
बाप प्रत्यक्ष जगतो
साधी ठेऊन राहणी
असे प्रत्येक बापाची
एक सारखी कहाणी
कवी- सुभाष मानवटकर निळं पाखरु
हिंगणा नागपूर
